ATƏT regionunda hərtərəfli təhlükəsizliyin hər üç ölçüsü üzrə təhlükəsizlik və stabillik üçün problemlərin artığı bir zamanda ATƏT və ATƏT PA arasında güclü koordinasiya və əməkdaşlıq daha çox əhəmiyyət daşıyır. Lent.az-ın məlumatına görə, bunu ATƏT Parlament Assembleyasının Siyasi Məsələlər və Təhlükəsizlik Komitəsinin sədr müavini Azay Quliyev ATƏT PA-nın plenar iclasında çıxışı zamanı deyib.
Azay Quliyev bildirib ki, məhz buna görə də, İslandiyalı həmkarı Steingrimsonun ATƏT PA və ATƏT arasında əməkdaşlığın gücləndirilməsinə yönəlik təşəbbüsü kimi hərtərəfli təhlükəsizliyə əsaslanan və ATƏT ərazisində mədəniyyət və əməkdaşlıq dialoqunun gücləndirilməsinə yönələn təşəbbüsləri yüksək qiymətləndirir: “Dialoq dedikdə mən təkcə üzv-ölkələr arasında bərabər və səmimi dialoqu yox, həmçinin ATƏT institutları və sahə missiyaları arasında sıx əməkdaşlığı nəzərdə tuturam. Bu institutlar ATƏT-ə üzv olan bütün dövlətlər arasındakı dialoqun vasitəçisi rolunda çıxış edir və bütün dövlətlər bu institutlardan bəhrələnirlər. Bunu nəzərə alaraq, mən əminliklə deyə bilərəm ki, bizim Assambleya daxil olmaqla, bütün ATƏT strukturları fikir ayrılığı olan zaman birləşdirici körpü rolunu oynamalıdır və bunun üçün biz çox iş görməliyik".
A.Quliyev əlavə edib ki ki, yeganə Pan-Avropa təhlükəsizlik təşkilatı kimi ATƏT-dən olan gözləntiləri doğrultmaq üçün ATƏT-in üç "səbəti" arasında bərabərhüquqluluq qorunmalı və gücləndirilməlidir: "Bundan başqa, biz, parlamentarilər olaraq, milli və beynəlxalq səviyyədə bütün məsələlərə kompleks yanaşmağa çalışmalıyıq. Şəxsən mən əminəm ki, ATƏT PA Sizin Ermənistan-Azərbaycan, Dağlıq Qarabağ münaqişəsindəki mövcud status-kvonun təhlükəli və qəbuledilməz olduğuna dair bəyanatınızı dəstəkləməlidir.
Sizin bügünki toplantıda iştirakınızı nəzərə alaraq, mən Sizdən bölgədəki təhlükəsizliyə və sabitliyə ən böyük təhdidlərdən biri olaraq qalan Ermənistan-Azərbaycan, Dağlıq Qarabağ münaqişəsinin sülh yolu ilə həlli prosesini qiymətləndirməyi xahiş edirəm. Ermənistan və Azərbaycanda keçritdiyiniz görüşlər zamanı Siz münaqişənin həlli üçün əsaslı görüşlərin vacibliyini vurğuladınız. Siz davamlı olaraq və açıq şəkildə bildirdiniz ki, mövcud qəbuledilməz və dayanıqsız status kvo şəraitində, yalnız effektiv və əsaslı danışıqlar vəziyyətin daha da kəskinləşməsinin qarşını ala bilər.
Bu kontekstdə münaqişə tərəflərinin bu cür danışıqlara nə dərəcədə hazır olması haqqında Sizin fikirləriniz bilməyə olduqca məmnun olardıq. Və əgər münaqişənin bir və ya hər iki tərəfində bu hazırlıq yoxdursa, fikrinizcə, bunun əsas səbəbi nədir?", - deyə sədr müavini qeyd edib.
