Rusiyanın "Rubin" klubunun türkiyəli futbolçusu Gökdəniz Qaradəniz FIFA-nın rəsmi saytına maraqlı açıqlamalar verib. Milli.Az fanat.az-a istinadən xəbər verir ki, Gökdəniz 28 yaşı olarkən keçdiyi "Rubin"ə uyğunlaşması barədə danışıb:
"Mən "Trabzonspor"da 10 il oynamışam. Mənə tanış olmayan fərqli iqlimə malik ölkəyə köçmək asan olmadı. Ancaq Kazanda mənim mədəniyyətimlə olan oxşarlıqlar uyğunlaşmama kömək etdi. Mən müsəlmanam və burada da islama inanırlar. Burada çoxlu gözəl məscidlər var. Kazan tamamilə fərqli şəhərdir. Rusiyadakı digər şəhərlərdən fərqlənir".
36 yaşlı yarımmüdafiəçi karyerası ilə bağlı danışarkən Kazan şəhərindəki gündəlik həyatından da söhbət açıb. O həmin şəhərdəki Azərbaycan restoranlarında tez-tez olduğunu bildirib: "Burada tarixi yerlər var və oralarda gəzməyi xoşlayıram. Kazanda bir neçə gözəl özbək, gürcü və Azərbaycan restoranları var. Həmin məkanlarda vaxt keçirməkdən zövq alıram. Əvvəlcə burada buz hokkeyinin daha çox sevildiyini düşünürdüm. Lakin avrokuboklarda oynamağa başlamağımız və ard-arda gələn uğurlar azarkeşlərin diqqətini çəkdi. Məncə, hazırda daha çox fanata sahibik və onların hər biri dəyərlidir".
Qeyd edək ki, Türkiyə millisinin sabiq üzvü 2008-ci ildən "Rubin"də çıxış edir. O, ölkəsi ilə yanaşı, Tatarıstanda da çox məşhurdur.
Milli.Az
