Bu il Dağlıq Qarabağ münaqişəsinin həlli prosesində bir çox müsbət və mənfi məqamlar müşahidə olunub.
Milli.Az xəbər verir ki, bunu Trend-ə ABŞ dövlət katibinin Avropa və Avrasiya məsələləri üzrə keçmiş köməkçisi və ABŞ-ın Azərbaycandakı keçmiş səfiri Metyu Brayza deyib.
Onun sözlərinə görə, bu ilin iyununa qədər prosesdə fəallıq müşahidə olunurdu, lakin prezidentlərin Sankt-Peterburq görüşündən sonra proses bir qədər ləngiyib.
M.Brayza deyib: "Ümid edirik ki, gələn il Azərbaycan və Ermənistan prezidentləri yeni görüş barədə razılığa gələcək və dialoq davam etdiriləcək."
Keçmiş səfir qeyd edib ki, ABŞ-ın yeni seçilmiş prezidenti Donald Trampın Cənubi Qafqazla bağlı hansı siyasəti həyata keçirəcəyi hələlik məlum deyil.
O deyib: "Tramp dəfələrlə qeyd edib ki, o, Rusiya ilə yaxşı münasibət qurmaq istəyir. Mən bildiyimə görə, ABŞ və Rusiyanın Cənubi Qafqazda birgə çalışdıqları yeganə format ATƏT-in Minsk qrupudur. İstisna olunmur ki, Tramp administrasiyası Rusiya ilə Minsk Qrupu çərçivəsində daha fəal çalışmaq istəyəcək".
Milli.Az
