Qətərlə bağlı böhran Körfəz ölkələrini qarışdırdı.
Hazırda 8 ərəb ölkəsi terroru dəstəkləmək və İranla münasibətlərə
görə Qətərlə bütün əlaqələsini kəsib. Böhran getdikcə daha da
şiddətlənir. Bu məsələdə Türkiyə və Rusiyanın nə edəcəyi maraqla
gözlənilir. Çünki Qətər Türkiyə ilə yaxın əlaqələrə sahibdir,
bununla yanaşı, böhranın səbəbi kimi göstərilən İran Rusiya ilə
müttəfiq kimi çıxış edir.
Azərbaycan Strateji Tədqiqatlar Mərkəzinin rəhbəri, politoloq
Natiq Miri Publika.az-a açıqlamasında Türkiyə və
Rusiyanın ata biləcəyi addımlar haqda danışıb.
Politoloq hesab edir ki, Türkiyə Körfəz ölkələri arasında seçim
etməyəcək: “Yəni Türkiyə hansısa ölkəni seçmək məcburiyyətində
deyil. Ankaranın yürütdüyü siyasət də tamamilə bunun əksinədir.
Hesab edirəm ki, Türkiyə Körfəz ölkələri arasındakı münasibətlərə
ciddi müdaxilə edəcək və tərəfləri danışıqlar masasına
əyləşdirəcək. Rusiya da tərəflərin danışıqlar masasına gəlməsi üçün
öz imkanlarından istifadə edəcək. Lakin bu məsələdə Türkiyənin
təsir imkanları daha çoxdur. Qətəri təcrid edən Səudiyyə Ərəbistan
və onun ətrafında birləşən ölkələr yalnız Türkiyə və ABŞ
rəhbərliyini eşidə bilər”.
N.Miri artıq Türkiyənin diplomatik vasitələri işə saldığını,
Ərdoğanın hərəkətə keçdiyini qeyd edib.
“Ərdoğan dünəndən bəri dörd ölkənin rəhbəri ilə telefon danışıqları
aparıb. Burada əsas problem Qətərin hansı güzəştlərə gedəcəyi ilə
bağlıdır. Hesab edirəm ki, bunun üçün yol xəritəsi hazırlanacaq”, -
deyə politoloq vurğulayıb.
Onun sözlərinə görə, Qətər İrana görə özünü qurban verməyəcək.
Regionda formalaşan anti-İran koalisiyasına Türkiyənin qoşulması
məsələsinə gəlincə, N.Miri qeyd edib ki, Türkiyə Səudiyyə
Ərəbistanın rəhbərliyi ilə yaradılacaq koalisiyaya qoşulacaq qədər
kiçik ölkə deyil.
“Türkiyə geosiyasi gücə malik olan ölkədir. Buna görə də ABŞ-ın
təzyiqi ilə olsa belə yenə də anti-İran koalisiyasına qoşulmayacaq.
Əslində Türkiyə və İran Yaxın Şərqdəki problemlərin həllinə birgə
nail ola bilərlər. Təbii ki, bu, İranın hansı mövqe
sərgiləyəcəyindən asılıdır”, - deyə politoloq diqqətə çatdırıb.
Asif