Bakı, 7 aprel, AZƏRTAC
Azərbaycan Respublikasının Prezidenti yanında Gənclər Fondunun dəstəyi ilə “Gənclərin Elmi İnkişafına Dəstək” İctimai Birliyi Mingəçevir və Yevlax şəhərlərində “Gənclərdə vətənpərvərlik və vətəndaşlıq hisslərinin gücləndirilməsi” layihəsinin icrasına start verib.
İctimai Birlikdən AZƏRTAC-a verilən məlumata görə, layihənin əsas mövzusu “Yeniyetmə və gənclərin vətənpərvərlik ruhunda tərbiyəsi”dir.
Təlimlərdən məqsəd gənclərdə vətənpərvərlik keyfiyyətlərini formalaşdırmaq üçün ictimai tərbiyə işinin səmərəliliyini yüksəltmək, onların dünyagörüşünü inkişaf etdirmək, özünütərbiyəsinə diqqəti artırmaq, sosial əhəmiyyət kəsb edən ideyaların, normaların və prinsiplərin mənimsənilməsinə yönəldilmiş fəallığı stimullaşdırmaqdır.
