Lent.az “Gəzməyə qərib ölkə...” rubrikasını davam etdirir. Bu rubrika çərçivəsində hər həftə dünyanın maraqlı yerlərindən biri barəsində bol görüntülü yazı hazırlayırıq. Təqdim etdiyimiz növbəti yer dünyanın ən maraqlı, ekzotik və görməli yerləri arasında xüsusi fərqlənən Efiopiyadır.
Efiopiyanı biz həm də Həbəşistan adı ilə tanıyırıq. Həbəşistan sözünün mənası “kölələr ölkəsi” deməkdir. Bu ölkə 19-cu əsrdə avropalı müstəmləkəçilərin işğalından qurtula bilən 2 Afrika dövlətindən (Liberiya ilə birgə) biridir. Həmçinin Efiopiya 1945-ci ildə BMT-nin yarandığı zaman bu təşkilata üzv olan ilk Afrika ölkəsidir.
1993-cü ildə Efiopiyanın Qırmızı dəniz sahilindəki bölgəsində keçirilən referendumun nəticəsi olaraq həmin bölgə Eritreya adı ilə müstəqilliyini elan edib.
Eritreyanın müstəqillik qazanması ilə Efiopiyanın dünya okeanı ilə əlaqəsi kəsilib və yalnız quru sərhədləri olan bir ölkəyə çevrilib.
Ölkənin paytaxtı Əddis Əbəbə şəhəridir. Şəhərin adının mənası “yeni çiçək” deməkdir.
1994-cü ildə 53 milyon əhalisi olan Efiopiya əhalisinin sayı artıq 104 milyona çatıb. Bununla da ölkə Afrikada ən çox əhalisi olan ikinci ölkədir.
Ölkənin rəsmi dili amhar dilir. Halbuki amharlar Efiopoya əhalisinin 27 faizini təşkil edir və etnik qruplar arasında sayına görə ikinci yerdədir.
Efiopiyada 82 dildə danışan müxtəlif xalq və tayfalar yaşayır ki, onlardan ən böyüyü 32 milyon nəfərlə Oromolardır.
Efiopiya əhalisinin sitayiş etdikləri dinlərin siyahısı da rəngarəngdir. Ölkə əhalisinin 51 faizi katolik xristianlığına, 10 faizi isə protestant xristianlığına sitayiş edir. 33 faiz insan isə İslam dinini qəbul edib. Efiopiya əhalisinin 4,1 faizi isə animist təriqətləri (ruhlara söykənən yerli inanclar) üstün tutub.
