Bakı, 1 iyun, AZƏRTAC
İyunun 1-də Fövqəladə Hallar Nazirliyinin (FHN) Dövlət Sularda Xilasetmə Xidməti (DSXX) Buzovna xilasetmə məntəqəsində 2015-ci il yay çimərlik mövsümünün açılışı ilə əlaqədar tədbir keçirib.
FHN-in mətbuat xidmətindən AZƏRTAC-a bildiriblər ki, tədbirdə yay çimərlik mövsümündə sularda xilasetmə işlərinin daha keyfiyyətli aparılması məqsədilə kadrların hazırlıq səviyyəsinin yüksəldilməsinə xüsusi diqqət yetirildiyi, çimərliklərdə həm Azərbaycan, həm də ingilis dilində xəbərdaredici və maarifləndirici lövhələr quraşdırıldığı bildirilib. Eyni zamanda, vətəndaşlarla aparılan təbliğat, maarifləndirmə işləri ilə bağlı məlumat verilib.
Qeyd olunub ki, təhlükəsizlik üçün xilasetmə texnika və avadanlığının, dalğıcların olduğu rəsmi çimərliklərdən istifadə edilməsi tövsiyə olunub. Ardıcıl olaraq həyata keçirilən tədbirlərin nəticəsidir ki, son dörd ildə FHN-in xilasedicilərinin fəaliyyət göstərdiyi rəsmi çimərliklərdə suda boğulma hadisəsi qeydə alınmayıb. Çimərlik mövsümündə suda boğulma hallarının qeyri-çimərlik ərazilərində baş verdiyini nəzərə alaraq vətəndaşların bu ərazilərdə istirahət etməmələri tövsiyə olunur.
Tədbirdə xilasedicilər suda boğulanların xilası və ilk tibbi yardımın göstərilməsi bacarıqlarını nümayiş etdiriblər.