Daşqınlardan sonra Tiflis zooparkında çətin anlar yaşanır.
ANS TV-nin məlumatına görə, 1927-ci ildə salınan Tiflis zooparkı 1960 və 1966-cı illərdə Vera çayında baş verən daşqınlar nəticəsində böyük ziyan görüb. Amma indiki qədər yox. Bəslədiyi canlıların yarısından çoxunu itirən park suyun qalxa bilmədiyi hissələrdə sağ qalmış heyvanları indi məhdud ərazidə cəm halında saxlamaqla onları yarana biləcək müxtəlif xəstəliklərdən qorumağa çalışır. Dünyanın bir çox heyvan parklarından isə Tiflisli həmkarlarına yardım məqsədilə müxtəlif təkliflərlə çıxış edənlər var. Bu təkliflər arasında Bakı zooparkının da adı yer alır.
Tiflis Zooparkının PR meneceri Mzia Şaraşidze deyir ki, London, İçveçrə, Bakı zooparkın, Moskva, Peterburq, bir sözlə dünyanın əksər zooparkları onlara öz köməklərini təklif edir. Praqa zooparkından kömək məqsədilə işçi qrupu gəlib. Həmçinin, İsraildən, Moskvadan bu cür nümayəndələr gələrək çətin vəziyyətdə köməklik göstərməyə çalışırlar.
Bu təkliflərin yüksək qiymətləndirildiyini deyən zoopark nümayəndəsinin sözlərinə görə hələlik hansı köməkdən necə istifadə olunması barədə qərar verilməyib. Ölkədə isə zooparka yardım məqsədilə xeyriyyə fondu yaradılıb. Hazırda parkın ərazisində təmizləmə işləri sürətlə davam etdirilir. Səhiyyə Nazirliyinin təklifi ilə meydana gələ biləcək xəstəliklərdən qorumaq məqsədilə könüllülərin ərazidən uzaqlaşdırılması qərara alınıb.
Hökumət isə yeni zooparkın şəhərin kənarında, Tiflis gölü ətrafındakı 50 ha-lıq ərazidə salınmasını nəzərdə tutub. Böyük bir xarabalığı xatırladan bu məkanda isə istirahət parkının salınması təklifi irəli sürülüb.
Onu da qeyd edək ki, Tiflis zooparkı bu fəlakətdə təkcə heyvanlarını yox, həm də 3 əməkdaşını itirdi.
