Bakı. Məlahət Nəcəfova - APA. ABŞ-ın Təlim və İnkişaf İnstitutu (ITD) tərəfindən idman müəllimləri və fiziki sağlamlığı məhdud insanlarla məşğul olan şəxslər üçün həyata keçirilən qrant proqramının təqdimatı olub.
APA-nın məlumatına görə, proqram çərçivəsində 2014-cü ilin payızında 14 azərbaycanlı müəllim əlil gəncləri idmana cəlb etmək sahəsindəki təcrübəsini öyrənmək üçün Massaçusets ştatına səfər edib.
Onlar 3 həftəlik proqram çərçivəsində amerikalı həmkarları və əlil gənclərlə birlikdə sosial fəaliyyətə, təlimlərə, idmana cəlb olunublar. Bugünkü tədbirdə təlimdə iştirak edən müəllim və işçilərin təqdimatları olub. Onlar ABŞ-da öyrəndiklərini təlim iştirakçıları ilə bölüşüblər.
ITD hazırda idman proqramının ikinci hissəsini həyata keçirir. Bu mərhələdə eyni proqramla bağlı ABŞ nümayəndə heyəti yanvarda 17-dən Azərbaycana səfərə gəlib. Bu səfər 2 həftə davam edəcək.
ABŞ-ın Azərbaycandakı səfirliyinin müvəqqəti işlər vəkili Derek Hoqanın sözlərinə görə, Beynəlxalq İdman Təşəbbüsü proqramı ABŞ Dövlət Departamentinin Təhsil və Mədəni Əlaqələr bürosu nəzdində fəaliyyət göstərən “Sports United” tərəfindən maliyyələşdirilir və ABŞ-ın Azərbaycandakı səfirliyi tərəfindən dəstəklənir. Proqramın Azərbaycan üzrə tərəfdaşları əlil idman proqramlarının inkişafı üzrə qeyri-kommersiya təşkilatları və Azərbaycan Paraolimpiya Komitəsidir.