Rusiya və Azərbaycan Fövqəladə Hallar nazirlikləri arasında 2009-2011-ci illər üçün kompleks əməkdaşlıq planı imzalanıb. Lent.az-ın Rusiya Fövqəladə Hallar Nazirliyinin rəsmi saytına istinadən verdiyi məlumata görə, sənədi Azərbaycan fövqəladə hallar naziri Kəmaləddin Heydərov və onun rusiyalı həmkarı Serqey Şoyqu imzalayıblar.

Rusiya FHN-nin beynəlxalq fəaliyyət Departamentinin rəhbəri Yuri Brajnikov iki ölkənin FHN-ləri arasında xeyli oxşarlıq olduğunu bildirib: “Azərbaycan FHN-i 2006-cı ildə yaradılıb və xilasetmənin Rusiya modelini seçib. Rusiya FHN-i də azərbaycanlı həmkarlarına öz köməkliyini göstərib. Regionda belə bir nazirliyin yaradılması bizi sevindirir. Çünki orada texnogen və fövqəladə vəziyyətlərin bütün riskləri mövcuddur».

Sənədə əsasən, Rusiya FHN Azərbaycan tərəfinə təkcə təchizat məsələlərində deyil, nazirliyin bundan sonrakı inkişafında da yardım edəcək: “Bura, əsasən, kadr hazırlığı daxildir. Yaxın vaxtlarda Bakıda Mülki Müdafiə Akademiyası yaradılacaq ki, bu prosesdə də rusiyalı mütəxəssislər iştirak edəcəklər”.

O, Azərbaycan FHN-in, əsasən, Rusiya istehsalı olan texnikalar, o cümlədən vertolyot və xilasetmə gəmiləri ilə təchiz olunduğunu diqqətə çatdırıb: “Azərbaycan Rusiyadan çoxfunksiyalı “Be-200” amfibiya təyyarəsi alan ilk ölkədir”.

J. Bajenov onu da bildirib ki, tərəflər üçüncü ölkə ərazisində xilasetmə işlərində birgə iştirak məsələsini də müzakirə ediblər.

Bundan başqa, Azərbaycan və Rusiya FHN-lərin Böhranlı Vəziyyətlərdə Milli İdarəetmə mərkəzlərinin fəaliyyətlərinin gələcəkdə əlaqələndirilməsi barədə də razılıq əldə olunub.