Müsavat-AXC cütlüyünün hakimiyyəti dövründə həmkarlar ittifaqlarını ləğv etmək istəyirdilər.
Trend-in məlumatına görə, bunu Azərbaycan Həmkarlar İttifaqları Konfederasiyasının sədri Səttar Mehbalıyev jurnalistlərə deyib.
S.Mehbalıyev qeyd edib ki, əgər o zaman Azərbaycan Həmkarlar İttifaqları Konfederasiyası yaradılmasaydı, həmkarlar təşkilatlarının fəaliyyəti dayana bilərdi: "Konfederasiya yaradılandan sonra bizə qarşı çox hücumlar oldu. Konfederasiyanın əmlakına da göz dikmişdilər. O dövrdə ölkə prezidenti olan Əbülfəz Elçibəy bizim binamızın Xarici İşlər Nazirliyiniə, kurort-turizm idarələrinin Səhiyyə Nazirliyinə verilməsi haqqında sərəncamlar imzaladı. Ancaq o sərəncamlar kağız üzərində qaldı. Biz o sərəncamların həyata keçməsinə imkan vermədik. Ondan sonra maliyyə nazirinin imzası ilə yerlərə məktub getmişdi ki, üzvlük haqqı yığılmasın. Yəni, maliyyə resursları ləğv ediləndən sonra həmkarlar ittifaqları öz-özünə dağılacaqdı, ancaq buna da nail ola bilmədilər və həmkarlar ittifaqları bugünkü səviyyəyə gəlib çatıb".
Qeyd edək ki, bu gün Azərbaycan Həmkarlar İttifaqlarının yaranmasının 110 illik yubleyi qeyd edilir.
Milli.Az
