“Mən heç döyüş başlamamışdan əvvəl vətənpərvərlik mövzusunda klip çəkdirmişəm. Bu günlərdə müharibə başlayanda isə özüm və oğlanlarım cəbhə bölgəsinə getdik”.

Bu sözləri Axşam.az-a açıqlamasında müğənni Manaf Ağayev deyib. O, əsgərlərə dəstək olduğunu bildirib.

İfaçı vətənpərvərlik mövzusunda klip çəkdirib, mahnı oxuyan həmkarlarını qınayıb:

“Kişi elədiyini deməz. Amma yardım da etmişəm. İcazə yoxdur olduğum yerləri açıqlayım. Bu gün klip meydanı deyil, cəbhəyə getmək zamanıdır. Əsgərlərin yanında olmaq lazımdır, onlar ruhlanır. Müharibə başlasa, təbii ki, ilk özüm gedəcəm. Mən qədər vətənini, torpağını, Qarabağı istəyən ikinci bir müğənni yoxdur. On albumum var, hansında vətənpərvərlik mövzusunda mahnı olmasa, onu sındıraram. Qarabağlıyam, döyüşə ilk mən getməliyəm, başqası yox”.

M.Ağayev cəbhəyə gedən müğənniləri qınayan sənət adamlarına sərt cavab verib:

“Bizi qınayanlar savadsız, xain insanlardır. Gedirsən qınayırlar, getmirsən qınayırlar. Gedirsən pul da xərcləyirsən, əziyət də çəkirsən. Qayıdırlar ki, reklam edir. O sözü deyənin cəsarəti çatırsa, pulunu mən ödəyirəm getsin. Amma cürəti yoxdur axı. Gedib orada bayraq əlində Qarabağ şikəstəsi oxuyursa, bunun nəyi pisdir? Məni tanımırlar ki, kiməm? Reklama ehtiyacım var? Mənim oğlum da əsgər gedib”.