Bakı. 25 fevral. REPORT.AZ/ INDEX - Azərbaycan İnsan Kapitalının İnkişafı Mərkəzi Xocalı Soyqırımının 26-cı ildönümünü anmaq məqsədi ilə “Xocalının səsi ol” adlı video çarx hazırlamışdır. Video çarxın əsas məqsədi Xocalı Soyqırmını dünya ictimaiyyətinin diqqətinə çatdırmaq olmuşdur. Bu məqsədlə İstanbulda təhsil alan xarici tələbələr könüllü olaraq, bu layihədə iştirak etmiş və bu soyqırımın sadəcə Azərbaycana qarşı deyil, o cümlədən bütün insanlığa qarşı törədilmiş bir cinayət olduğunu vurğulayaraq Xocalının səsi olmuşlar.
Xocalı soyqırımı Azərbaycan tarixinə ən dəhşətli və faciəli səhifələrdən biri kimi daxil olmuşdur.1992-ci il fevralın 25-dən 26-sına keçən gecə erməni silahlı dəstələri silahsız və köməksiz Xocalı şəhərinə hücum etmişlər. Fevralın 26-sı səhər saat 5-ə kimi şəhər erməni işğalçıları tərəfindən zəbt edilmişdir.Erməni qoşunlarının vəhşiliyi nəticəsində Xocalı əhalisindən 613 (106 nəfəri qadın, 63 nəfəri uşaq, 70 nəfəri qoca insanlar) nəfər öldürülmüş, 487 nəfər şikəst olmuş, 1275 nəfər dinc sakin əsir götürülərək ağlasığmaz erməni zülmünə, təhqir və həqarətlərinə məruz qalmışlar. 150 nəfərin taleyi hələ də məlum deyildir.Xocalı faciəsində 8 ailə bütövlükdə məhv edilmiş, 24 uşaq hər iki valideynini, 130 uşaq isə valideyinlərindən birini itirmişdir.