"Metro və sərnişin avtobuslarında gediş haqqının qaldırılması digər sahələrdə qiymət artımına gətirib çıxarmayacaq. Bu cür yanaşma qətiyyən düzgün deyil. Çünki bu artım yanacağın qiymətində olmayıb ki, desinlər ki, qiymətlər qalxacaq. Axı bütün yük daşınmaları, təchizat metro və avtobus vasitəsilə həyata keçirilmir ki, bu da digər sahələrə təsir eləsin. Metro və avtobuslarda gediş haqqının artmasının digər sahələrdəki qiymətlərə təsiri, ümumiyyətlə, qeyri-mümkündür".
Bu barədə Milli.Az-a açıqlamasında Tarif Şurasının metro və sərnişin avtobuslarında gediş haqqının artırılması ilə bağlı qərarını şərh edən Milli Məclisin İqtisadi siyasət, sənaye və sahibkarlıq komitəsinin üzvü, YAP Siyasi Şurasının üzvü Aydın Hüseynov bildirib.
Metro və marşrut avtobuslarında gediş haqqı artırılıb
Onun sözlərinə görə, bu cür qərarın verilməsi gözlənilən idi və normal qarşılanmalıdır: "Bildiyiniz kimi, metropolitenin gəlirləri xərclərini heç zaman bağlamır, qalan hissə dövlət büdcəsindən dotasiya şəklində maliyyələşir. Onu da bilirik ki, Bakıda əhalinin əksər hissəsi, eləcə də şəhərin qonaqları ictimai nəqliyyatda əsasən metrodan istifadə edir. Metropolitendə xidmətlərin daha da yüksəldilməsi, komfortun təmin edilməsi, keyfiyyətin artırılması üçün isə onun gəlirləri artmalıdır. Ona görə də bu məsələdə dövlətin yükünün azaldılması və onun metro istifadəçiləri arasında bölüşdürülməsi çox düzgün addımdır. Eyni şeyi avtobus təsərrüfatı barədə də demək olar. Avtobus parklarının yenilənməsi, onların ehtiyat hissələrinin alınması bu cür qərarın verilməsini zəruri edirdi. Onların xərclərinin qarşılanması müqabilində bu cür artım normaldır".
A.Hüseynov qeyd edib ki, gediş haqlarının artması əhalinin büdcəsinə ciddi təsir etməyəcək: "Hesab edirəm ki, metro və marşrut avtobuslarında gediş haqqının bugünkü artımı əhalinin gəlirlərinə uyğundur. Ona görə də bu artım vətəndaşların ümumi büdcəsinə ciddi təsir etməyəcək. Çünki Azərbaycan orta aylıq əmək haqqının səviyyəsinə görə MDB-də 5-ci yerdədir. Nəqliyyat, yəni metro və avtobus xərclərini də digər MDB ölkələri ilə müqayisə etdikdə görürük ki, gediş haqqının bu qədər artırılmasını normal səviyyə hesab edilməlidir.
Dövlətin bundan qənaət olunan vəsaiti isə ilk növbədə ümumilikdə metro və avtobus təsərrüfatının, ictimai nəqliyyatın sağlamlaşdırılmasına, eləcə də müxtəlif sosial layihələrə, xərclərə, əmək haqlarının, təqaüdlərin artırılmasına, ümumilikdə vətəndaşların sosial rifah halının yüksəldilməsinə, xüsusən aztəminatlı sosial təbəqənin problemlərinin həllinə yönəldilməsinə yönəldiləcək. Ona görə də Tarif Şurasının bu qərarı məqsədəuyğundur".
