Moskva Vaşinqtondan qitələrarası nüvə ballistik raket imkanlarını məhdudlaşdırmaq məqsədi daşıyan Strateji Silahların Azaldılması üzrə Müqavilə ilə bağlı yeni təklif alıb.
Metbuat.az xəbər verir ki, Rusiya xarici işlər nazirinin müavini Sergey Ryabkov belə açıqlama verib. O bildirib ki, Rusiya ABŞ-dan strateji sabitlik və silahlara nəzarətlə bağlı dialoqun yenidən başlaması ilə bağlı təkliflər alıb. Onun sözlərinə görə, yeni təklif yazılı formada göndərilsə də, rəsmi deyil.
Yeni təklifi dəyərləndirən Rusiya xarici işlər nazirinin müavini sənəddə yeni detalların olmadığını vurğulayaraq, “Bu, tərəflərə məlum olan mövqedir, sadəcə bir araya gətirilib. Biz sakit işləyirik və lazım olan vaxt amerikalılara cavab verəcəyik” deyə bildirib.
