Sarayevo, 9 iyun, AZƏRTAC
Bosniya və Herseqovina ilk Avropa Oyunlarında 57 idmançı ilə təmsil olunacaq. Bu barədə Sarayevoda “Bakı-2015”lə bağlı keçirilmiş mətbuat konfransında məlumat verilib.
Köhnə qitənin ilk böyük miqyaslı yarışı olan “Bakı-2015”dən bəhs olunan tədbirdə yarışların 50 ölkədən 6 mindən artıq atleti bir araya gətirəcəyi vurğulanıb. Bildirilib ki, ilk Avropa Oyunlarının proqramına Olimpiya idman növləri ilə yanaşı, dörd qeyri-olimpiya idman növü də daxildir. Bu yarış, həmçinin bəzi idman növləri üzrə 2016 Yay Olimpiya Oyunları üçün təsnifat xarakteri daşıyır.
Diqqətə çatdırılıb ki, “Bakı-2015”də 57 idmançı və 19 məşqçi ilə təmsil olunacaq Bosniya və Herseqovina nümayəndə heyətinə Said Fazlagiç başçılıq edəcək. Bu ölkəni təmsil edəcək idmançılar 8 idman növü (atletika, üzgüçülük, boks, avarçəkmə, cüdo, velosiped, atıcılıq, stolüstü tennis) üzrə mübarizə aparacaqlar.
Maqsud Dadaşov
AZƏRTAC-ın xüsusi müxbiri
Sarayevo
