“Bank Respublika” və KfW bank qrupunun üzvü olan Almaniya İnvestisiya Şirkəti DEG 12,5 mln. ABŞ dolları məbləğində yeni kredit müqaviləsi imzalayıb.

Bankın baş ofisindən Lent.az-a verilən məlumata görə, kredit müqaviləsi 8 il müddətinə imzalanıb ki, bu da “Bank Respublika”nın resurs bazasını uzunmüddətli dövr üçün artırmağa və resursların diversifikasiya səviyyəsini yüksəltməyə imkan yaradır. Bu müqavilə çərçivəsində vəsaitlər ipoteka kreditləşməsi üzrə əməliyyatların maliyyələşdirilməsinə yönəldiləcək.


Qeyd edək ki, “Bank Respublika” 1992-ci ildən fəaliyyət göstərir və Azərbaycanın aparıcı banklarındandır. Bankın səhmdarları sırasında 25% + 1 səhm payla Almaniyanın 2 böyük maliyyə təşkilatları - KfW bank qrupunun üzvü DEG və Sparkassen-Finanzgruppe üzvü SIDT mövcuddur.

Bu ilin 1 noyabr tarixinə “Bank Respublika”nın aktivləri 386 mln. AZN, kredit portfeli 272 mln. AZN, depozit portfeli 139 mln. AZN təşkil edir. 2008-ci ilin ötən 10 ayı ərzində bankın aktivlərinin artımı 52%, kredit portfelinin artımı 71%, depozit portfelinin artımı 25% olub. Hazırda “Bank Respublika”nın Bakıda və regionlarda 30 filial və şöbəsi fəaliyyət göstərir.

Nigar Məmmədli