Ermənistan Futbol Federasiyasının (EFF) prezidenti Ruben Ayrapetyan İrəvanın “Ararat” klubunun baş meneceri Varujan Simonovu döyüb.

Lent.az-ın “armfootball.com”a istinadən məlumatına görə, hadisə noyabrın 15-də Ermənistan çempionatının “Pünik” və “Ararat” arasında keçirilən “qızıl oyunu”ndan sonra baş verib.

“Ararat” rəsmisi həmin oyuna çıxarkən üzünü tribunada oturan R.Ayrapetyana tərəf tutaraq “Çempion biz olacağıq” deyib. Bununla da V.Simonov EFF-in “Pünik”ə tərəfkeşlik etməsinə etirazını bildirib.

Oyun “Ararat”ın 1:0 hesablı qələbəsi ilə başa çatıb. Qarşılaşmadan sonra R.Ayrapetyanın oğlu V.Simonovu maşınına mindirərək şəhər kənarına aparıb. Orada klub rəsmisi EFF prezidentinin cangüdənlərini görüb. Sonradan R.Ayrapetyanın özü də gəlib çıxıb. Federasiya başçısı əvvəlcə V.Simonovu təhqir edib, sonra isə onu döyüb.

Hadisə ilə bağlı mətbuat konfransı keçirən “Ararat” rəhbərliyi EFF prezidentindən Ermənistan prokurorluğuna şikayət edəcəklərini açıqlayıb.