Bakı, 1 sentyabr, AZƏRTAC
"Bakcell" şirkəti və Azərbaycan Futbol Federasiyaları Assosiasiyası (AFFA) Mançester Yunayted Futbol Məktəbinə seçim prosesinin nəticələrini açıqlayıb.
Şirkətdən AZƏRTAC-a bildiriblər ki, "Bayıl Arena" stadionunda təşkil olunan seçim prosesində iştirak edən 86 uşaqdan 13-ü seçimlərdən müvəffəqiyyətlə keçərək Mançester Yunayted Futbol Məktəbinə qəbul olunub. Seçilmiş uşaqlar üçün 6 həftəlik sınaq müddəti təyin olunub. Bu sınaq müddətini müvəffəqiyyətlə başa vuran uşaqlar yaş qruplarına uyğun olaraq U-10, U-11 və U-12 qruplarında məşqlərdə iştirak edəcəklər.
Seçimlər Mançester Yunayted Futbol Məktəbindən Azərbaycana ezam olunmuş məşqçi Mick Benett, AFFA tərəfindən isə Samir Ələkbərov və Cahangir Həsənzadə tərəfindən aparılıb.
