A–
Bakı, 15 fevral, AZƏRTAC
Səudiyyə Ərəbistanının Təhqiqatlar və Prokurorluq Bürosu Məkkədəki “əl-Haram” məscidində kranın aşmasında təqsirli bilinənlərin siyahısını 50 nəfərədək genişləndirib.
AZƏRTAC RİA Novosti informasiya agentliyinə istinadla xəbər verir ki, iki həftə əvvəl Ər-Riyadda yerləşən Təhqiqatlar və Prokurorluq Bürosu Məkkəyə təhqiqat üçün 40 şübhəlinin adı olan fayl göndərmişdi. Qurumun Məkkədəki ofisi tərəfindən siyahıya hökumət tərəfindən “əl-Haram” məscidinin genişləndirilməsi layihəsini kurasiya edən daha 10 nəfərin adı əlavə olunub.
Mənbənin məlumatına əsasən, şübhəlilər zəvvarlar üçün məkanı genişləndirmək məqsədi ilə kranın bəzi dayaqlarının sökülməsinə göstəriş veriblər. Qəzada təqsirli bilinən şəxslər yaxın vaxtlarda məhkəmə qarşısına çıxarılacaq.
Məscidin sahəsinin genişləndirilməsi üzrə 14 milyard dollarlıq layihə “Saudi BinLaden Group” kompaniyası tərəfindən həyata keçirilirdi. Bir qədər əvvəl kompaniyanın yeni layihələrdə iştirakına qadağa qoyulduğu və maliyyə nazirliyinə onun fəaliyyətinin yoxlanılması barədə göstəriş verildiyi barədə məlumat yayılıb.
Təmir işlərindən sonra məscidin 2,2 milyon insanı qəbul edə biləcəyi gözlənilir.
Xatırladaq ki, 2015-ci il sentyabrın 11-də güclü külək səbəbindən “əl-Haram” məscidində kranın aşması nəticəsində 109 nəfər həlak olmuş, 230 nəfərdən çox insan isə müxtəlif dərəcəli xəsarətlər almışdı.
