Sabiq Yuqoslaviya üzrə Beynəlxalq Tribunalın qərarı ilə Bosniya serblərinin sabiq lideri Radovan Karaciç bəşəriyyətə qarşı cinayətlərdə suçlu bilinib.
Milli.Az Reuters-ə istinadən bildirir ki, o, 1992-1995-ci illərdə Bosniya-Hersoqovinadakı müharibələrdə çoxsaylı qətllər və repressiyalarda suçlanıb.
Karaciç habelə Bosniya-Hersoqovinanın paytaxtı Sarayevoda minlərlə insanın ölümü ilə sonuclanmış mühasirənin təşkilində, BMT-nin sülhməramlılarının girov götürülməsində ittiham olunub.
R.Karaciç Bosniya-Hersoqovinanın müsəlmanlar və xorvatlar yaşayan bölgələrində dinc əhaliyə divan tutmaqda da suçlanıb.
O, Srebrenitsa şəhərində müsəlmanlara qarşı soyqırımın da təşkilatçısıdır. 1995-ci ilin yayında Bosniya-Hersoqovinadakı serblərin "Serb Respublikası"nın hərbi birləşmələri Srebrenitsa kənini ələ keçirərək 8 min müsəlmanı qətlə yetirmişdilər.
Məhkəmənin qərarı ilə o, 40 il müddətinə azadlıqdan məhrum olunub.
Radovan Karaciç "Müsəlman qəssabı" kimi tanınır.
Milli.Az