19 yaşadək futbolçulardan ibarət Azərbaycan millisi antirekorda imza atıb.
Milli.Az apasport.az-a istinadən xəbər verir ki, yığmamız Rusiyanın Sankt-Peterburq şəhərində keçirilən Valentin Qranatkinin xatirəsinə həsr olunan turnirdəki uğursuz çıxışı ilə azarkeşlərini məyus edib.
Komandamız qrup mərhələsində keçirdiyi 3 oyunda cəmi 1 xal toplayıb. Litvaya 1:2, Slovakiyaya 0:1 hesabı ilə uduzan Təbriz Həsənovun yetirmələri yalnız Qazaxıstandan xal ala bilib - 2:2. Bu isə yalnız qrup sonuncusu olmaq üçün kifayət edib.
2009-cu ildən bu turnirin daimi iştirakçısı olan komandamız üçün qrupda 1 xal ən aşağı göstəricidir. Yığmamız 2014-cü ildə də qrupu 1 xalla tamamlamışdı. İndi isə 3 il əvvəlki antirekordu təkrarlayıb.
2015-ci ildə qrupda iki qələbə qazanan komanda 6 xalla rekordunu vurmuşdu. 2013 və 2016-cı illərdə 4 xala sevinən millimiz son illərdəki bu uğurunu fiasko ilə davam etdirib.
2009 və 2012-ci illərdə qrupda 1 qələbəsi olan yığmamız 2010 və 2011-ci illərdə 3 oyundan ikisində heç-heçəyə nail olmuşdu.
Qeyd edək ki, yığmamız 9-16-cı yerlər uğrunda mübarizə aparmalı olacaq.
Milli.Az
Digər maraqlı xəbərlər Milli.Az-ın Facebook səhifəsində
