Maliyyə naziri: “Alkoqollu içkilər və tütün məmulatlarının qiyməti iki dəfə arta bilər”

Maliyyə naziri: “Alkoqollu içkilər və tütün məmulatlarının qiyməti iki dəfə arta bilər”
13:18 21 Noyabr 2017
Ölkə mətbuatı
A- A+

2018-ci il üçün Azərbaycan dövlət büdcəsinin gəlirləri 20 milyard 127 milyon manat nəzərdə tutulub. Büdcə layihəsi dünyada cərəyan edən proseslərin Azərbaycan iqtisadiyyatına təsiri və Azərbaycan iqtisadi proqnozları əsas götürülərək hazırlanıb.

Publika.az xəbər verir ki, bu fikirləri maliyyə naziri Samir Şərifov Milli Məclisdə 2018-ci ilin Dövlət büdcəsi haqqında qanun layihəsini təqdim edərkən deyib.

Nazir bildirib ki, səmərəli iqtisadi tədbirlər nəticəsində ölkə iqtisadiyyatında geriləmə 3,3 faizdən 0,3 faizə qədər azalıb:

“Xarici ticarət dövriyyəsində 4.4 milyard dollar müsbət saldo əldə edilib.

Baklı-Tiflis-Qars dəmir yolu xəttinin istifadəyə verilməsi Azərbaycanın ənənəvi investisiya üçün möhkəmliyini qoruduğunu göstərir”.

Samir Şərifov vurğulayıb ki, 2018-ci ilin dövlət büdcəsinin gəlirləri 20,127 milyard manat nəzərdə tutulub. Bu, ÜDM-in 29 faizi həcmində olmaqla, 2017-ci ilin təsdiq olunmuş proqnozu ilə müqayisədə 3,361 milyard manat və ya 20 faiz, ötən ilin faktiki icra göstəricisi ilə müqayisədə 2,621 milyard manat və ya 15 faiz çoxdur.

Dövlət büdcəsinin gəlirləri üzrə proqnozun 7,907 milyard manatı və ya 39,3 faizi Vergilər Nazirliyinin xətti ilə daxilolmaların, 9,216 milyard manatı və ya 45,8 faizi Dövlət Neft Fondundan transfertin, 2,43 milyard manatı və ya 8 faizi Dövlət Gömrük Komitəsinin xətti ilə daxilolmaların, 574 milyon manatı və ya 2,8 faizi isə digər gəlirlərin payına düşür.

Azərbaycanın 2018-ci il dövlət büdcəsinin layihəsində dövlət borcuna xidmətlə bağlı 2,263 mlrd. manat həcmində vəsaitin ayrılması nəzərdə tutulur ki, bu da 2017-ci ilin analoji proqnozu ilə müqayisədə 37,8% çoxdur.

Samir Şərifov qeyd edib ki, manatın ABŞ dollarına nisbətən kəskin ucuzlaşması cari ildə alkoqollu içkilər və tütün məmulatlarının qiymətinin artımına səbəb olub. Növbəti ildən bu məhsullara aksiz vergisinin 2 dəfəyədək artırılması nəzərədə tutulub. Bu da daxili bazarın qorunması, xaricə valyuta axınının qarşısını almağa xidmət edəcək.

2018-ci il dövlət büdcəsinin xərcləri cari ilin təsdiq olunmuş büdcə xərcləri ilə müqayisədə 2 milyard 965 milyon manat və ya 16,5 faiz çox olmaqla, mütləq ifadədə 20 milyard 906 milyon manat məbləğində proqnozlaşdırılır. 2018-ci il üçün dövlət büdcəsi xərclərinin tərkibində sosialyönümlü xərclərin xüsusi çəkisi 36,6 faiz olacaq. Elm, təhsil, səhiyyə, sosial müdafiə və sosial təminat sahələrinə 5 milyard 372 milyon manat vəsait nəzərdə tutulur. Bütövlükdə bu sahələr üzrə nəzərdə tutulmuş xərclərin dövlət büdcəsi xərclərinin tərkibində xüsusi çəkisi 25,7 faiz təşkil edəcək.

Mədəniyyət, incəsənət, informasiya, bədən tərbiyəsi xərclərinin maliyyələşməsi üçün 304 milyon manat vəsait nəzərdə tutulur ki, bu da cari illə müqayisədə 22 milyon manat çoxdur”.

Qeyd edək ki, 2018-ci il üçün büdcə kəsiri 778,7 mln. manat həcmində nəzərdə tutulub.

Azərbaycanın 2018-ci il icmal büdcəsinin gəlirləri isə 23 223,2 mln. manat məbləğində proqnozlaşdırılır. Gələn il icmal büdcənin xərcləri isə 26 674,1 mln. manat məbləğində gözlənilir. Bu isə 2017-ci ilin proqnozuna nisbətən 3 895,4 mln. manat və yaxud 12,7% azdır.

Gülxar


Xəbərin orijinal ünvanı: http://publika.az/news/gundem/221537.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR