Bakı. 23 noyabr. REPORT.AZ/ Ötən gün Gürcüstanda keçrilən antiterror əməliyyatı nəticəsində zərərsizləşdirilən çeçen əsilli 3 terrorçudan biri İstanbulun Atatürk hava limanında törədilən terror aktını planlaşdıran “Tək qol” ləqəbli Əhməd Receboviç Çatayevdir.
“Report” xəbər verir ki, bunu "Haberturk" yazıb.
Məlumata görə, Ə.Çatayev 2012-ci ildən terrorçu İŞİD qruplaşmasının dəstəbaşçılarından biri olan Ömər Şişani ilə birlikdə fəaliyət göstərib.
Qeyd edək ki, noyabrın 22-də Tbilisidə keçirilən antiterror əməliyyatı nəticəsində çeçen əsilli 3 terrorçu zərərsizləşdirilib, biri tutulub.
Xatırladaq ki, 2016-cı il iyunun 28-də Türkiyənin Atatürk hava limanında 3 terrorçu-kamikadze terror aktları törədib. Üç partlayış nəticəsində 47 nəfər həlak olub, 250-yə yaxın insan xəsarət alıb.
