“Saxo Bank”: Azərbaycanın Asiya İnfrastruktur İnkişaf Bankına üzv olması vacib addımdır

“Saxo Bank”: Azərbaycanın Asiya İnfrastruktur İnkişaf Bankına üzv olması vacib addımdır
18:23 23 Aprel 2015
Ölkə mətbuatı
A- A+


Bakı, 23 aprel, AZƏRTAC
Azərbaycanın Çin Xalq Respublikasının təşəbbüsü ilə yaradılan Asiya İnfrastruktur İnkişaf Bankına (AİİB) üzv olması vacib addımdır.
AZƏRTAC xəbər verir ki, bu barədə “Saxo Bank”ın baş iqtisadçısı Stin Yakobsen bildirib.
Bu prosesi müsbət qiymətləndirən S. Yakobsen qeyd edib: “İqtisadi, coğrafi və inkişaf baxımından Azərbaycanın AİİB-ə qoşulması vacib bir addımdır. Belə ki, AİİB Çindən başlayacaq “Yeni İpək Yolu” strategiyasının müjdəçisidir, Çinin şərqindən İtaliyanın qərb hissəsinə qədər Avrasiyanı, həmçinin Afrikanın cənubunu əhatə edəcək. Çinin təklif etdiyi kredit, investisiya yatırımları və qarşılıqlı ticarət münasibətlərini planlaşdıran layihəni bir növ Çinin Avrasiya üçün nəzərdə tutulmuş “Marşal planı” da adlandırmaq olar. AİİB Çinin 14 milyard dollar həcmində rezervi sayəsində maliyyələşdiriləcək. Təşkilatın il ərzində 1 trilyon dollarlıq investisiya və dövriyyəsi olacağı gözlənilir”.
“AİİB böyük perspektivə malik bir təşkilatdır və belə bir beynəlxalq maliyyə institutunun təsisçi üzvü olaraq Azərbaycan regionla bağlı mühüm qərarların qəbul ediləcəyi masa arxasında yer alaraq prosesin iştirakçısına çevriləcək. Asiya İnfrastruktur İnkişaf Bankına üzv olmaqla Azərbaycan “Yeni İpək Yolu”nda iştirak etmək, infrastruktur layihələri üçün yeni kredit resursları və ticarət dövriyyəsinin artırılması imkanları əldə edəcək”, - deyə “Saxo Bank”ın nümayəndəsi vurğulayıb.
Qeyd edək ki, ötən həftə Azərbaycan AİİB-nin gələcək təsisçi üzvü kimi təsdiqlənib. Bu il aprelin 27-də Pekində keçiriləcək bankın təsis müzakirələrində Azərbaycan hökuməti də iştirak edəcək.

Xəbərin orijinal ünvanı: http://azertag.az/xeber/Saxo_Bank_Azerbaycanin_Asiya_Infrastruktur_Inkisaf_Bankina_uzv_olmasi_vacib_addimdir-849148

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR