“Əvvəlcədən paltardəyişmə otağında demişdim ki, Azərbaycanla matçın gərginliyini nəzərə alsaq, fiasko ilə bitə bilər”.
Metbuat.az-ın məlumatına görə, bunu Belçika yığmasının futbolçusu Romelu Lukaku Azərbaycan millisini 5:0 hesabı ilə məğlub etdikləri AVRO-2024-ün seçmə mərhələ oyunu ilə bağlı danışarkən deyib.
30 yaşlı hücumçu görüşdən əvvəl rəqibə ciddi yanaşmaları üçün komanda yoldaşları ilə söhbət etdiklərini bildirib: “Qələbəyə və Avropa çempionatına vəsiqə qazandığımıza görə şadam. Leuvendə meydanın durumu pis olsa da, oyuna yanaşmamız və motivasiyamız yaxşı idi. Sürətli oynamaq, ilk yarım saatda qol vurmaq vacib idi. Bundan sonra qısa zamanda ardıcıl qollar vurduq. Bu, çox vacib idi. Azərbaycanın yaxşı komanda olduğunu bilirdik. Əks təqdirdə, İsveçə 3:0 hesabı ilə qalib gəlməzdilər. Yan Vertongenlə birlikdə matça uğurlu başlamaq üçün komandaya motivasiya verdik”.
Qeyd edək ki, seçmə mərhələdə 20 xal toplayan Belçika yığması F qrupunda 1-ci yeri tutub. 7 xal toplayan Azərbaycan millisi isə 4-cü olub.
