Bakı, 19 iyun, N.HƏSƏNOV, AZƏRTAC
“Bakı-2015” birinci Avropa Oyunlarında kişilər və qadınlar arasında çimərlik voleybolu üzrə yarışlar davam edir.
İyunun 19-da qadınların yarışlarında yarımfinalçılar müəyyənləşib. Belə ki, qızıl medala gedən yolda İsveçrəni təmsil edən Nikola Eyholzer – Nina Betşart cütlüyü italiyalı Laura Qiombini – Julia Toti dueti ilə üz-üzə gələcək. Litvalı voleybolçular Yeva Dumbauskaite – Monika Povilaitite dueti isə avstriyalı Lena Mariya Plesiutşniq – Katarina Şutzenhofer cütlüyü ilə qarşılaşacaq.
Kişilərin yarışında isə Azərbaycan cütlüyü onaltıdabir finala vəsiqə qazanıb. Neilton Santos – Yaroslav Rudıx dueti ukraynalı Aleksey Denin – Oleq Plotnitskiyə 2:1 hesabı ilə qalib gələrək növbəti mərhələyə yüksəlib.
