Bakı - APA. "Bakı-2015" I Avropa Oyunlarının boks yarışlarında Azərbaycanı təmsil edən Pərviz Bağırov (69 kq) 1/4 finala yüksəlib.
Apasport.az saytının məlumatına görə, mübarizəyə bu gündən qoşulan Pərviz Bağırov 1/8 finalda əvvəlki döyüşündə Anas Messaudini məğlub edən moldovalı Vasili Belusla qarşılaşıb.
21 yaşlı boksçumuz debütdəcə yarışa yaxşı hazırlaşdığını nümayiş etdirib. Avropa çempionumuz "London-2012"nin iştirakçısı olmuş rəqibinə çətin anlar yaşadaraq, hər 3 raundu xeyrinə bitirib – 3:0 (30:27; 20:27; 30:27).
P. Bağırov 1/4 finalda Abass Baraou (Almaniya) ilə döyüşəcək. Görüş iyunun 23-də saat 21:15-də baş tutacaq.