Nazir müavini Qarabağdan danışdı

Nazir müavini Qarabağdan danışdı
18:01 21 Yanvar 2015
108 Ölkə
Ölkə mətbuatı
A- A+

Xarici İşlər Nazirliyində Azərbaycan və Latviya arasında XİN-lərarası siyasi məsləhətləşmələrin növbəti mərhələsi keçirilib.

ANS PRESS-in XİN-ə istinadla verdiyi məlumata görə, məsləhətləşmələrdə Azərbaycan Respublikasını xarici İşlər nazirinin müavini Xələf Xələfov, Latviyanı isə xarici işlər nazirliyinin dövlət katibi Andres Pildeqoviç təmsil edib.

Xələf Xələfov Azərbaycanın ilə Latviya arasında ikitərəfli əsasda və bir sıra beynəlxalq və regional təşkilatlar, xüsusilə Avropa İttifaqı çərçivəsində səmərəli əməkdaşlığın olduğunu qeyd edərək, ölkələrimiz arasında siyasi, iqtisadi, təhsil, kənd təsərrüfatı və digər sahələrdə ikitərəfli münasibətlərin daha da inkişaf etdirilməsi üçün əlverişli imkanların olduğunu bildirib.

İki ölkə arasında münasibətlərin mövcud inkişaf səviyyəsindən razılığını ifadə edən Andres Pildeqoviç hal-hazırda Avropa İttifaqı Şurasına sədrlik edən Latviyanın bir sıra tədbirlər keçirməyi planlaşdırdığını və Azərbaycanın sözügedən tədbirlərdə iştirakından məmnun olacaqlarını diqqətə çatdırıb. Yüksək səviyyəli dövlət rəsmilərinin səfər mübadiləsinin həyata keçirilməsinin ikitərəfli münasibətlərin inkişafında önəmini vurğulayan Andres Pildeqoviç cari ildə bir sıra səfərlərin planlaşdırıldığını diqqətə çatdırıb.

Ermənistan-Azərbaycan Dağlıq Qarabağ münaqişəsi haqqında məlumat verən Xələf Xələfov, Azərbaycan torpaqlarının Ermənistan tərəfindən işğalını, təcavüz və etnik təmizləmə siyasəti nəticəsində bir milyondan çox azərbaycanlının fundamental hüquqlarının pozulduğunu, Avropa İttifaqında bu məsələyə münasibətdə ikili standartlara yol verildiyini, sözügedən münaqişənin regionda sülhə və təhlükəsizliyə ciddi təhdid yaratdığını bildirib. Aİ-nın bütün mövcud münaqişələrə münasibətdə vahid yanaşma göstərməsinin zəruriliyini xüsusilə qeyd edib.

Andres Pildeqoviç dövlətlərin ərazi bötüvlüyü və suverenliyinin Latviya üçün fundamental prinsip olduğunu vurğulayıb.
Görüş zamanı qarşılıqlı maraq kəsb edən regional və qlobal məsələlər ətrafında fikir mübadiləsi aparılıb.
Mənbə
ANS PRESS


RƏYLƏR

BU KATEQORİYADAN DİGƏR XƏBƏRLƏR