Merkel Qarabağ bəyənatı verdi

Merkel Qarabağ bəyənatı verdi
19:41 21 Yanvar 2015
155 Dünya
Ölkə mətbuatı
A- A+

Almaniya Dağlıq Qarabağ münaqişəsinin həlli istiqamətində ATƏT-in Minsk qrupunun həmsədrlərinin fəaliyyətini yaxından izləyir və bu istiqamətdə aparılan danışıqları dəstəkləyir.

Bunu Almaniya Kansleri Angela Merkel Berlində Azərbaycan Prezidenti İlham Əliyevlə birgə keçirilən brifinqdə deyib.

A.Merkel həmçinin vurğulayıb ki, bütün münaqişələr, o cümlədən Dağlıq Qarabağ münaqişəsi yalnız sülh yolu ilə həll olunmalıdır.

Kansler son vaxtlar Ermənistan və Azərbaycan qoşunlarının təmas xəttində atəşkəsin tez-tez pozulmasından təəssüfləndiyini bildirib.

"Azərbaycan Avropanın, həmçinin Almaniyanın enerji təhlükəsizliyində böyük rol oynayır. Biz bunu yüksək qiymətləndiririk. Biz Cənub Qaz Dəhlizi layihəsini dəstəkləyirik".

A.Merkel bildirib ki, Azərbaycan Prezidenti ilə görüşdə bir çox məsələlər ətrafında fikir mübadiləsi aparıblar, geosiyasi vəziyyəti müzakirə ediblər: "Biz Dağlıq Qarabağ münaqişəsi barədə danışdıq. Avropa Şurasının, Avropa İttifaqının bu məsələdə töhfə verə biləcəyini müzakirə etdik. Dağlıq Qarabağ münaqişəsi yalnız sülh yolu ilə həll oluna bilər".

O, həmçinin bildirib ki, görüşdə Azərbaycanın Avropa İttifaqı ilə əməkdaşlığını davam etdirməsi, Şərq Tərəfdaşlığı çərçivəsində münasibətlərin genişləndirilməsi barədə də müzakirələr aparılıb.

Almaniya Kansleri qeyd edib ki, Azərbaycanla Almaniya arasında 2,5 milyard avro həcmində ticarət dövriyyəsi mövcuddur.

Azərbaycan-Almaniya münasibətləri barədə sualları cavablandıran A.Merkel deyib ki, Almaniya Azərbaycanın infrastruktur layihələrinin həyata keçirilməsində yaxından iştirak edə bilər.
Mənbə
Trend


RƏYLƏR

BU KATEQORİYADAN DİGƏR XƏBƏRLƏR