Tərtər rayonunun Səhlabad kəndində məskunlaşan Laçın rayonundan məcburi köçkün, 50 yaşlı Rizvan Zeynalabdin oğlu Bədəlov hərbi sursatın partlaması nəticəsində yaralanıb. Milli.Az El TV-yə (Region TV) istinadən xəbər verir ki, hadisə onun hasarın kənarına topladığı tullantılar yandırılan zaman baş verib:
"Tullantıları yandırıb. Bu zaman alov qalxıb. Bu da alovu söndürmək istəyib ki, ətrafa yayılmasın. Bu zaman orada nə isə partlayıb", - deyə yaralının qohumu Elçin Atakişiyev bildirib.
Partlayış zamanı yaralanan Rizvan Bədəlov Bərdə Mərkəzi Rayon Xəstəxanasına yerləşdirilib. İlkin müayinədən sonra onun cərrahi əməliyyat olunması üçün Bakı şəhərindən xüsusi ayrılan vertolyotla həkim-cərrah gətirilib. Keçirilən əməliyyat zamanı Rizvan Bədəlovun bədənindəki qəlpələr tamamilə çıxarılıb. Hazırda yaralının vəziyyəti orta ağır qiymətləndirilir.
"Xəstənin vəziyyəti keçirdiyi əməliyyata uyğundur. Hər şey qaydasındadır", - deyə həkim-cərrah Zaur Əliyev bildirib.
Hərbi sursatın Qarabağ uğrunda gedən döyüşlər zamanı əraziyə atıldığı ehtimal edilir. Hadisə ilə bağlı Tərtər Rayon Polis Şöbəsində araşdırma aparılır.
Milli.Az
