Bu gün dünyanın ən böyük derbilərindən biri baş tutacaq. Fanat.az xəbər verir ki, Türkiyə Super Liqasının XXVI turunun matçında "Qalatasaray" - "Fənərbaxça" matçı keçiriləcək.
Əslində, bu matç martın 20-də baş tutmalı idi. Amma həmin gecə "Türk Telekom Arena"da terror təhlükəsi olduğundan qarşılaşma təxirə salınmışdı. Bu gecə eyni məkanda baş tutacaq görüşün start fiti Bakı vaxtı ilə saat 20.30-da çalınacaq.
Qeyd edək ki, bu komandalar arasında 382-ci qarşılaşma olacaq. İlk dəfə 1909-ci ilin 17 yanvarında qarşılaşan əzəli rəqiblərin 107 illik rəqabətində "Fənərbaxça" 144, "Qalatasaray" 122 qələbə qazanıb, 115 görüşdə qalib müəyyənləşməyib. Top fərqi də "sarı-lacivərdlilər" üstündü - 529:481.
Əzəli rəqiblər 58-ci mövsümü keçirilən ölkə çempionatında 117 dəfə üz-üzə gəlib. Bu oyunlarda "Fənərbaxça" 48, "Qalatasaray" 33 qələbə qazanıb, 36 matç "sülh"lə bitib. Top fərqi də "Fənər"in xeyirinədi - 151:116.
Onu da qeyd edək ki, "Fənərbaxça" cari mövsüm keçirdiyi 27 oyunda 60 xal toplayaraq turnir cədvəlinin 2-ci pilləsində qərarlaşıb və 28 oyunda 66 xal qazanan lider "Beşiktaş"dan 6 xal geri qalır. Uğursuz mövsüm keçirən "Qalatasaray" isə 27 oyundan sonra 40 xalla 7-ci pilləni tutur.
Türkiyə
Super Liqa
XXVI tur
13 aprel
20.30 Qalatasaray - Fənərbaxça
Qalatasaray (gözlənilən heyət): Fernando Muslera, Cason Denayer, Hakan Balta, Sabri Sarıoğlu (Semih Kaya), Rayan Donk, Selcuk İnan, Olcan Adın, Uesli Sneyder, Lukas Podolski, Yasin Öztekin, Umut Bulut.
Fənərbaxça (gözlənilən heyət): Volkan Demirel, Bruno Alveş, Simon Kyaer, Gökhan Gönül, Mehmet Topal, Jozef de Souza, Caner Erkin, Dieqo, Volkan Şen, Nani, Robin van Persi.
Hakimlər: Mete Kalkavan, Aleks Taşçıoğlu, Esat Sancaktar, Talqa Özkalfa.
Əlavə köməkçi hakimlər: Sarper Barış Saka, Burak Taşkınsoy.
İstanbul. "Türk Telekom Arena".