Saray qəsəbəsi Qasım bəy Zakir küçəsində, gölün ətrafında yaşayan dörd ailə, sözün əsl mənasında suyun içində qalıb. İş o yerə çatıb ki, evə daxil olmaq belə müşkül məsələyə çevrilib. Şikayətçilər deyir ki, sanki yarımadada yaşıyırıq. İki ilə yaxındır ki, adıçəkilən qəsəbədə məskunlaşan ailələr, daşan gölün qarşısını öz gücünə, süni yolla almağa çalışır. Bunun üçün onlar evlərinin qarşısına əl arabaları ilə torpaq daşısalar da bunun bir köməyi olmayıb. Sakinlər hətta suyun çəkilməsi üçün kiçik həcimli motor da qoşublar. Amma bu da bir fayda vermir.
Şikayətçilər düşdükləri vəziyyətlə bağlı dəfələrlə qəsəbə nümayəndəsinə və bələdiyyəyə müraciət etdiklərini bildirirlər. Amma bu müraciət də bir nəticə verməyib.
Məsələ ilə bağlı Abşeron rayon Saray bələdiyyəsindən bildirdilər ki, ərazidə olan gölə çirkab sularının axıdılması və yağışların yağması suyun səviyyəsini artırıb. Artıq məsələ ilə bağlı adiyyəti qurumlara məlumat da verilib. Eyni zamanda artıq müəyyən işlərə də başlanılıb.
"Qurum əraziyə yığılan suyu çəkmək məqsədilə yeni borular alıb. Yaxın 3-5 gün ərzində nasoslar vasitəsi ilə su kanalizasiya xəttinə vurulacaq. Bundan sonra əraziyə yığılan su tədricən azalacaq" – deyə bələdiyyənin sədr müavini Məhi Həsənov bildirib.
Nə deyirik, yorulmayasınız. Görülən işlər də tezliklə sakinləri razı salsın. Su içində olan günlərini sadəcə acı xatirə olaraq yada salsınlar.
Mənbə
Xəbərçi Orxan Mahmudoğlu
