Birləşmiş Krallıqda və Avropanın digər ölkələrində "Brexit" üzrə referendumun yaratdığı çaşqınlığa baxmayaraq, yeni qlobal tənəzzül ehtimal edilmir.

Milli.Az AZƏRTAC-a istinadən bildirir ki, bu sözləri Beynəlxalq Valyuta Fondunun (BVF) baş direktoru Kristin Laqard AFP agentliyinə eksklüziv müsahibəsində deyib.

BVF-in baş direktoru bildirib ki, Böyük Britaniyada Avropa İttifaqından (Aİ) çıxmaqla bağlı keçirilən səsvermə bir sıra vətəndaş narazılıqlarına səbəb olub. Bu isə Aİ-ni bir çox məsələlərdə daha aydın və şəffaf olmağa sövq edəcək.

İqtisadi qeyri-müəyyənliyə baxmayaraq, Kristin Laqard optimist görünür. O deyib: ""Brexit" Aİ-nin bir çox ölkələri üçün iqtisadi inteqrasiyanı dərinləşdirmək baxımından katalizator rolu oynaya bilər."

Milli.Az