Azərbaycanda kazinoların fəaliyyətinə qoyulmuş rəsmi qadağa qumar həvəskarlarına qumar masası arxasında varidatlar uduzmağa mane olmur.
Milli.Az xəbər verir ki, bu yaxınlarda virtualaz.org Tbilisinin "Şanqri La" kazinosunda bir neçə saat ərzində 270 min dollar uduzmuş keçmiş deputat Fərhad Qəribov barədə yazmışdı.
Son illər ərzində Azərbaycanda poker üzrə peşəkar oyunçular zümrəsi formalaşıb ki, onlar artıq beynəlxalq turnirlərdə iştirak edilər və bəzən qələbə də qazanırlar. Yəqin ki, ölkənin ən məşhur və adlı-sanlı qumarbazı Ramin Hacıyevdir. O, bu günlərdə Maltada keçirilmiş turnirdə 334 min avro qazanıb.
Oktyabrın sonlarında Ramin Hacıyev Maltada keçirilən Avropa Poker Turunun sonuncu mərhələsinin final masası arxasına əyləşmək hüququ qazanmış altı oyunçudan biri olub. Qeyd edək ki, TOP-6 sırasına düşməyin özü hər bir oyunçuya 98700 avro mükafat qazandırır. Bu azmış kimi, Ramin Hacıyev poker ictimaiyyəti tərəfindən bu mərhələnin hayrolleri adlandırılıb. Poker terminologiyasından baş çıxarmaqda çətinlik çəkən oxucularımıza bildirək ki, hayroller dedikdə inanılmaz yüksək limitlərdə oynamaq bacarığı olan və çox böyük məbləğlərdə "stavka" edən oyunçular nəzərdə tutulur. Belə insanlar üçün bir neçə saat ərzində yarım milyon, bəzən isə 1 milyon dollar uduzmaq adi işdir. Halbuki, adi öləri üçün bu qədər pulu qazanmağa bir ömür də bəs etməyə bilər.
Azərbaycanlı qumarbaz yarışın yalnız həndszap (yalnız iki oyunçunun iştirak etdiyi) mərhələsində Yeni Zelandiya təmsilçisinə uduzub.
Final masasının yekunu: Devid Yan - €465800, Ramin Hacıyev - €334400, Aleksey Xoroşenin - €217400, Maks Silver - €164030, Nikita Bosyakovski - €127400, Ole Şemion - €98740.
Milli.Az 
