Azərbaycan, Bakı, 6 yanvar /Trend, müxbir İlkin İzzət/
Bakıda ticarət obyektlərində vətəndaşların telefonlarını oğurlayan gənclər tutulub.
Bakı şəhər Baş Polis İdarəsinin mətbuat xidmətindən Trend-ə verilən məlumata görə, Nəsimi RPİ 22-ci PB əməkdaşlarının həyata keçirdikləri əməliyyat-axtarış tədbirləri nəticəsində Masallı rayon sakini, 1995-ci il təvəllüdlü Allahqulu Mehdiyev tutulub.
O, dekabrın 21-də gecə saatlarında Azadlıq prospektində yerləşən ticarət mərkəzlərindən birində Kamran Mehrəliyə məxsus mobil telefonu masanın üzərindən gizli şəraitdə oğurlamaqda şübhəli bilinir. Saxlanılarkən şübhəli şəxsin üzərindən 1,946 qram tiryək aşkar olunaraq götürülüb.
Elə həmin bölmənin əməkdaşlarının həyata keçirdikləri digər əməliyyat-axtarış tədbirləri nəticəsində Bakı şəhər sakini, 1993-cü il təvəllüdlü Vüsal Dadaşov tutulub. O, yanvarın 4-də Tolstoy küçəsində yerləşən mağazalardan birində Bakı şəhər sakini Aysel Gəraybəyliyə məxsus mobil telefonu masanın üzərindən gizli şəraitdə oğurlamaqda şübhəli bilinir.
Məqalə müəllifi ilə əlaqə ünvanı: agency@trend.az
