Baş nazirdən QARABAĞ ŞƏRTİ, 22:00-da QİYAMƏT... – GÜNÜN SİYASİ XÜLASƏSİ

Paylaş

Nikol Paşinyan parlamentdə çıxışı zamanı Dağlıq Qarabağ münaqişəsinin həlli üçün Azərbaycanla danışıqlara hazır olduqlarını bildirib. Paşinyan Azərbaycan qarşısında qondarma şərt də irəli sürüb.

“Qarabağ münaqişəsinin nizama salınması ilə bağlı Azərbaycan rəhbərliyi ilə danışıqlar aparmağa hazıram. Lakin qeyd etmək istəyirəm ki, münaqişədə Dağlıq Qarabağ tərəf kimi çıxış etməyənə qədər danışıqların heç bir effekti olmayacaq”, - deyə o iddia edib.

Nikol Paşinyan parlamentdə çıxışı zamanı Dağlıq Qarabağdan danışıb. Paşinyan “erməni xalqı Qarabağda qələbənin möhkəmləndirilməsinə heç vaxt olmadığı qədər yaxındır” deyə iddia edib.

O, Ermənistan və “Qarabağ xalqı” üçün xidmət göstərməyin vaxtı çatdığının deyib.

“Arsax (Dağlıq Qarabağ - red.) və onun “qəhrəman xalqı”na sevgi və dəstək sözlərini ünvanlamaq istəyirəm. Əziz qarabağlılar! Yarım aydır davam edən etiraz aksiyası sizin üçün təhlükəli deyil, əksinə bu, Dağlıq Qarabağın tanınmasına gətirib çıxaracaq. Biz buna heç vaxt olmadığı qədər yaxınıq”, - deyə Paşinyan parlamentdə deputatların qarşısında çıxışı zamanı bildirib.

“Rusiya Federasiyasıyla strateji ittifaq münasibətləri Ermənistanın prioriteti olaraq qalacaq”. Bunu erməni müxalifətinin lideri Nikol Paşinyan parlamentdə baş nazirin seçilməsi məsələsinin müzakirəsi ilə bağlı keçirilən iclasda deyib.

“Bizim münasibətlərimiz hüquq bərabərliyi və dostluğa əsaslanaraq qurulmalıdır. Rusiyayla hərbi əməkdaşlıq Ermənistanın təhlükəsizliyinin təmin olunmasının əhəmiyyətli amilidir”, - Paşinyan bildirib.

O, növbəti dəfə vurğulayıb ki, Ermənistan Avrasiya İqtisadi İttifaqı və Kollektov Təhlüksizlik Müqaviləsi təşkilatlarında qalacaq.

Serj Sarkisyanın istefasından sonra baş nazir vəzifəsini icra edən Karen Karapetyan da istefa verdiyini açıqlayıb. Bu haqda Karapetyan “facebook” səhifəsində yazıb.

“Hər kəsə təşəkkür etmək istəyirəm. Məsuliyyətli və maraqlı dövr idi. Yeni baş naziri təbrik edirəm. Ona və növbəti baş nazirlərə uğurlar arzulayıram”, - deyə o bildirib.

Ermənistanın yeni baş naziri Nikol Paşinyan ilk səfərini Azərbaycanın işğal olunmuş Dağlıq Qarabağ bölgəsinə edəcək. Bu barədə N. Paşinyan jurnalistlərə açıqlamasında deyib.

O, Qarabağa mayın 9-da səfər edəcəyini və qondarma rejimin “prezidenti” Bako Saakyanla görüşəcəyini bildirib.

ABŞ Federal Təhqiqatlar Bürosunun xəfiyyələri yaxın günlərdə Ermənistana səfər edəcək. Bu barədə Ermənistanın “Jamanak” qəzeti şəxsi mənbələrə istinadən məlumat yayıb.

Məlumata görə, amerikalı xəfiyyələr Ermənistandan qanunsuz kapital axınını araşdıracaqlar.

“FTB əməkdaşları erməni oliqarxları və vəzifəli şəxslərin Ermənistandan qanunsuz yolla qazandıqları pulları ABŞ-a köçürərək, “yumaları” məsələsi üzərində işləyirlər”, - deyə məlumatda bildirilir.

Qəzet amerikalı xəfiyyələrin İrəvanda aparacaqları əməliyyatın məxfi olduğunu yazıb. Həmçinin, qeyd edib ki, bu əməliyyat Ermənistandakı oliqarxlar üçün ciddi zərbə olacaq.

Münbiç əməliyyatı ilə bağlı Türkiyə-ABŞ danışıqları davam edir. Bu haqda Türkiyənin Müdafiə Naziri Nurəddin Canikli bildirib.

Qeyd edək ki, Suriyanın Münbiç şəhərinin gələcəyi Türkiyə-ABŞ münasibətlərində gərginlik yaradan əsas məsələlərdəndir. Ankara şəhərin PYD terror təşkilatından təmizlənməsi tələb edir. ABŞ isə terror təşkilatına dəstəyini davam etdirir.

Rejim qüvvələri ölkədə kimyəvi silah tətbiq edəcəyi halda Bəşər Əsədə sadiq qüvvələr yenidən hədəfimizə çevriləcək. Bu sözləri Fransanın Müdafiə naziri Florens Parli deyib.

Xatırladaq ki, aprelin 14-də ABŞ Prezidenti Donald Trampın əmri əsasında ABŞ, Fransa və İngiltərə aviasiyası Suriyada Bəşər Əsəd rejiminə məxsus hərbi obyektlərə zərbə endirib.

İŞİD terror qruplaşmasının lideri Əbubəkr Bağdadi Suriyada gizlənir. Bu barədə İraq Daxili İşlər Nazirliyinin Kəşfiyyat və Terrorçuluqla Mübarizə İdarəsinin rəhbəri Əbu Əli əl-Bəsri danışıb.

“Bizdə olan son informasiyaya görə, o, Deyr əz-Zordan 18 mil uzaqlıqda yerləşən Həcin şəhərindədir”, - Bəsri deyib.

Onun sözlərinə görə, bu informasiya onlara bir qədər əvvəl daxil olub. Sözügedən informasiyadan Rusiya, Suriya və İran silahlı qüvvələrinin birgə əməliyyatlarının həyata keçirilməsi məqsədi ilə istifadə edilməsi planlaşdırılır.

ABŞ Prezidenti Donald Tramp İranın nüvə proqramı ilə əlaqədar Hərtərəfli Birgə Fəaliyyət Planı (HBFP) ilə bağlı qərarını elan edəcək. Ağ Ev rəhbəri bu barədə öz Tvitter səhifəsində yazıb.

“Bu gün saat 14:00-da (yerli vaxtla) Ağ Evdə İranla olan müqavilə barədə qərarımı açıqlayacağam”, - deyə dövlət başçısı bildirib.

ABŞ prezidenti Donald Tramp İranın nüvə proqramı üzrə Birgə hərtərəfli iş Planından çıxmağa köklənib. Bu haqda avropalı diplomatlara istinadən “The New York Times” qəzeti bildirib.

Onların məlumatlarına görə, Tramp Almaniya, Fransa və Böyük Britaniyanın liderləri onlarla danışıqların gedişatında bu barədə xəbərdar edib. Bundan başqa, Avropa liderləri İrana qarşı əlavə sanksiyaların tətbiq ediləcəyi barədə məlumatlandırılıb.

İran yəhudi dövlətinə hücum etmək üçün Suriyaya çox təhlükəli silah yerləşdirməyə çalışır. Bunu İsrailin baş naziri Benyamin Netanyahu Kipr prezidenti Nikos Anastiadis və Yunanıstanın baş naziri Aleksis Siprasla Nikosiyada görüşü zamanı bildirib.

İran Suriyada bu silahla… - Netanyahu şok PLANI AÇIQLADI

ABŞ-ın Corctaun Universitetinin professoru Mtyu Kroeniq “Amerika strategiyasının məntiqi: strateji üstünlük niyə əhəmiyyətlidir” kitabında Rusiyanın ABŞ-a nüvə zərbəsinin nəticələrinin modelini hazırlayıb. Rusiya ABŞ-a iki böyük nüvə zərbəsi vuracaq.

Tədqiqatçının sözlərinə görə, birinci hücumdan sonra Moskva 131 Amerika şəhərini məhv edəcək və bu, 70 milyon insanın ölümünə gətirib çıxaracaq. Alim qeyd edir ki, belə itkilər ABŞ-ın Rusiyaya cavab zərbəsini vurmaq cəhdlərini dəf etməyə hesablanıb.

100 milyon insan öləcək, 143 şəhər məhv ediləcək – Dünyanın sonunu gətirəcək HÜCUMUN MODELİ

Çin Xalq Respublikasının sədri Si Cinpin Çinin Dalyan şəhərində Koreya Xalq Demokratik Respublikasının lideri Kim Çen Inla görüşüb. Bu haqda “Sinxua” agentliyi bildirib.

Xatırladaq ki, mart ayında Şimali Koreya liderinin “sirli qatar”la Çinə səfər etdiyi iddiaları yayılmışdı. Sonradan iddia öz təsdiqini tapmış, Şimali Koreya liderinin Çin səfərinin təfərrüatı mətbuata açıqlanmışdı.

“Əlaqədar tərəflər Pxenyan barəsində düşmən siyasətini dayandırarsa, Koreya Xalq Demokratik Respublikası nüvə silahından imtina edəcək”. Bu haqda Şimali Koreyanın lideri Kim Çen In Çin Xalq Respublikasının sədri Si Cinpinlə görüşün gedişatında bildirib.

“Lazımdır ki, əlaqədar tərəflər Şimali Koreya barəsində düşmən siyasəti və təhdidlərdən imtina etsin. Onda Koreya Xalq Demokratik Respublikasının nüvə silahına malik olmasına ehtiyac olmayacaq və denuklearizasiya mümkün olacaq”, - Kim Çeni In deyib.

Ömər Dağlı