Həssas psixi vəziyyət bir sıra qeyri-sağlam həyat tərzi və siqaretlə müqayisədə qocalmanı daha çox sürətləndirir.
Metbuat.az "SciTechDaily" nəşrinə istinadən xəbər verir ki, bu barədə "Deep Longevity" şirkəti araşdırma aparıb.
Belə ki, yaşlandıqca, molekulyar dərəcədə zərərlər üst-üstə yığılır və qocalma ilə əlaqəli zəiflik və ciddi xəstəliklərin inkişafı artır. Bu molekulyar proseslər bəzi insanlarda digərlərinə nisbətən daha çox olur və bu, ümumiyyətlə sürətlənmiş qocalma adlanan vəziyyətə səbəb olur.
Xoşbəxtlikdən, qocalmanın rəqəmsal modellərindən (yaşlanma saatları) istifadə etməklə qocalmanın artan tempini aşkar etmək mümkündür. "Aging-US" jurnalında dərc olunan məqaləyə görə, hər hansı bir qocalma əleyhinə terapiya insanın fiziki sağlamlığı qədər psixi sağlamlığına da diqqət yetirməlidir. "Deep Longevity"nin ABŞ və Çin alimləri ilə apardığı beynəlxalq əməkdaşlıq tənhalıq, bədbəxt hiss etmə və ya narahat yuxunun qocalma sürətinə təsirini ölçüb və bunun əhəmiyyətli olduğunu aşkar edib.
Elmi məqalədə 11914 çinli yetkin insanın qanı və biometrik məlumatları ilə öyrədilmiş və təsdiqlənmiş yeni qocalma saatı yer alır.
Qocalmanın sürətlənməsi insult, qaraciyər və ağciyər xəstəlikləri olan insanlarda, siqaret çəkənlərdə və həssas psixi vəziyyətdə olan insanlarda aşkar edilib. Əslində, bədbəxt, ümidsiz və tənha hiss etmək insanı siqaretdən daha çox yaşlandırdığı sübut edilib.
Buna görə də, məqalə müəllifləri belə qənaətə gəlirlər ki, qocalmanın psixoloji aspekti nə tədqiqatlarda, nə də praktiki yaşlanma əleyhinə tətbiqlərdə nəzərdən qaçırılmamalıdır.
