“Trabzonspor” Türkiyə Super Liqasının yeni mövsümünə gözlənilən startı verə bilməyib.
Metbuat.az xəbər verir ki, Qaradəniz təmsilçisi çempionatın ilk 3 turunda cəmi 4 xal toplayıb.
“Trabzonspor” mövsümün ilk oyununda səfərdə “Kasımpaşa” ilə 1:1 hesablı heç-heçə edib. Ardınca doğma meydanda “Başakşehir”i 2:1 hesabı ilə məğlub edən komanda son turda səfərdə “Amedspor”a 1:2 hesabı ilə uduzub.
Komandanın UEFA Avropa Liqasındakı çıxışı da uğursuz olub. Pley-off mərhələsində Macarıstanın “Ferencvaros” klubu ilə qarşılaşan “Trabzonspor” ilk oyunda 0:1 hesabı ilə məğlub olub. Cavab matçında isə rəqibinə 0:4 hesabı ilə uduzaraq turnirdən kənarda qalıb.
Beləliklə, “Trabzonspor” bu mövsüm keçirdiyi ilk 5 rəsmi oyunda cəmi bir qələbə qazanıb. Komanda bir matçda heç-heçə edib, 3 qarşılaşmada isə meydanı məğlub tərk edib. Bu oyunlarda İstanbul? rəqib qapısına 4 qol göndərən “Trabzonspor” öz qapısında 9 top görüb.
Komandanın nəticələri ötən mövsümlə müqayisədə də diqqət çəkir. “Trabzonspor” ötən mövsüm Super Liqanın ilk 3 turunda qələbə qazanaraq 9 xal toplamışdı. Bu mövsüm isə həmin müddətdə cəmi 4 xal əldə edə bilib. Ötən mövsüm 3-cü turdan sonra 3-cü pillədə qərarlaşan komanda hazırda 11-ci sırada yer alır.
Səfər oyunlarında da geriləmə müşahidə olunur. Ötən mövsüm çempionatda səfərdə ən çox xal toplayan komandalardan biri olan “Trabzonspor” 17 səfər matçında 11 qələbə, 3 heç-heçə və 3 məğlubiyyətlə 36 xal qazanmışdı. Bu mövsüm isə ilk iki səfər oyunundan cəmi 1 xalla ayrılıb.
Böyük ümidlərlə heyətə cəlb olunan misirli ulduz Məhəmməd Salahın komandaya gəlişi də hələlik gözlənilən effekti verməyib. Mövsümün ən diqqətçəkən transferlərindən biri kimi təqdim olunan 34 yaşlı futbolçu “Trabzonspor”dakı ilk oyunlarında azarkeşlərin gözləntilərini tam doğrulda bilməyib.
Salahın performansı ilə bağlı fikirlər də fərqlidir. Bəzi azarkeşlər onun əvvəlki illərdəki formasından uzaq olduğunu düşünür, digərləri isə ulduz futbolçunun qarşıdakı matçlarda daha yaxşı çıxış edəcəyinə inanır.
Komandanın mövsümə uğursuz başlaması və Salahın hələlik gözlənilən səviyyədə çıxış etməməsi “Trabzonspor”da artıq mövsümün əvvəlindən ciddi suallar yaradıb.
