Bakı, 3 noyabr, AZƏRTAC
Noyabrın 12-22-dək İslandiyanın paytaxtı Reykyavikdə kişilər və qadınlar arasında şahmat üzrə Avropa komanda çempionatları keçiriləcək. 36 komandanın iştirak edəcəyi turnirlərin hər ikisi İsveçrə sistemi üzrə təşkil ediləcək və 9 turdan ibarət olacaq.
AZƏRTAC xəbər verir ki, hər komandaya 4 əsas və 1 ehtiyat oyunçu daxildir.
Azərbaycanın kişilərdən ibarət yığma komandasının (Teymur Rəcəbov, Şəhriyar Məmmədyarov, Arkadi Naydiç, Rauf Məmmədov və Eltac Səfərli) baş məşqçisi Aleksandr Xalifmandır.
Fikrət Südeyifzadənin baş məşqçi olduğu qadınlardan ibarət yığma komandada isə Zeynəb Məmmədyarova, Ülviyyə Fətəliyeva, Gülnar Məmmədova, Xəyalə Abdulla və Nərmin Kazımova çıxış edəcəklər.
Elo reytinqinə görə turnirin favoriti Rusiya yığmasıdır. Reytinq üzrə ikinci yeri Ukrayna, üçüncü yeri Azərbaycan komandası tutur.