Roma, 12 yanvar, AZƏRTAC
Baş nazir Matteo Renzi Sultan Ahmet meydanında insan tələfatı ilə nəticələnmiş partlayışla əlaqədar bildirib ki, İtaliya xalqı və hökuməti Türkiyənin kədərini bölüşür. O, Türkiyədəki terror aktını pisləyərək deyib ki, terrorizmə qarşı birlikdə sərt mübarizə aparılmalıdır.
İstanbuldakı faciəvi hadisədən sonra İtaliyanın xarici işlər naziri Paolo Centiloni türkiyəli həmkarı Mevlüt Çavuşoğluya zəng edərək ölkəsinin partlayış zamanı həlak olmuş şəxslərin ailələrinin və Türkiyə hökumətinin yanında olduğunu deyib. O əlavə edib ki, İtaliya və Türkiyə hazırda heç vaxt olmadığı qədər terrorizmlə mübarizədə sıx birləşib.
Maqsud Dadaşov
AZƏRTAC-ın xüsusi müxbiri
Roma