Bakı. 23 oktyabr. REPORT.AZ/ Noyabrın 11-də Azərbaycan Dövlət Akademik Opera və Balet Teatrında italyan bəstəkarı Cüzeppe Verdinin “Riqoletto”operasının tamaşası keçiriləcək.
Teatrın Mətbuat xidmətindən "Report"a verilən məlumata görə, tamaşada Riqoletto partiyasını xalq artisti Əvəz Abdullayev ifa edəcək.
Ə.Abdullayevlə yanaşı, tamaşada xalq artisti Əli Əsgərov (Sparafuçille), gənc solist Nina Makarova (Maddalena) da çıxış edəcəklər.
Tamaşada əsas partiyalardan biri olan Cilda partiyasını Belarus Milli Akademik Böyük Opera və Balet Teatrının solisti, vokalçıların beynəlxalq müsabiqələr laureatı Tatyana Qavrilova ifa edəcək. O, Cilda partiyasının ən yaxşı ifaçılarından biri hesab olunur.
Ukrayna Milli operasının solisti, Ukraynanın Əməkdar artisti, vokalçıların beynəlxalq müsabiqələr laureatı Dmitri Kuzmin "Riqoletto" operasının tamaşasında Hersoq rolunu ifa etmək üçün dəvət olunub.
Tamaşanı xalq artisti, professor Cavanşir Cəfərov idarə edəcək.