Uzun müddətdir sənətdən uzaqlaşan müğənni Xalid Hacıyev yenidən səhnəyə qayıdır.

Axşam.az-a açıqlama verən Xalid yeni mahnılar üzərində çalışdığını deyib:

“Sən ağlasan” adlı yeni mahnımın sözləri Elnur İrəvanlı, musiqisi Nailə Ramazanovaya aiddir. Bundan öncə iki yeni mahnım olub, birinin sözləri və musiqisi mənə aid “Ağ qara” idi. Digəri yenə də sözləri Elnur İrəvanlı, bəstəsi Nailə Ramazanovaya aiddir. Əslində oxunuş tərzimdə yeni bir yol tapmışam. Bilmirəm bu yaşımla əlaqədərdi, yoxsa yaşadıqca öyrəndiklərimdəndir. Yeni bir tərz fikirləşmişəm. Allah izn versə, yaxın vaxtlarda tamaşaçılara təqdim edəcəm”.

Xalid uzun müddətdir sənətdən uzaq qalmasının səbəblərini açıqlayıb:

“Gündəm axı nədir? Efirlərə pul töküb, əldən-ayaqdan gedən bəzi həmkarlarım sonda nə edir? Toya gedir da... Əlbəttə bizə dolanmaq lazımdır. Məsələn, uzun müddətdir toylardan uzaqlaşmağım maddi mənada mənə baha başa gəlsə də, mənəvi cəhətdən çox rahatam. Bir vaxtlar “Dönəcəksən” mahnısıyla tək ölkəyə yox, xaricə də səs salmışdım. Əsla bunu özümü tərif kimi demirəm. Amma işimlə gündəmə gəlmişdim. İndi çox şeylər dəyişib, insanlar yalnış yerdədir. Bir vaxtlar şou-biznesin başında Brilliant Dadaşova, Zülfiyyə Xanbabayeva, İlqar Muradov, Azər Zeynalov dururdusa, indi buranı idarə edənlərin adlarını belə çəkmək istəmirəm. Bir vaxtlar əlindən tutub səhnəyə gətirdiyim ulduzcuqlar indi yanımdan düz keçir. Mənsə buna yalnız gülürəm”.

Qeyd edək ki, Xalid "Yeni ulduz 4" yarışmasının iştirakçısı olub.

"Yeni ulduz"un Xalidi illər sonra səhnəyə qayıdır