Avtomobil alarkən bir çox insan ilk növbədə qiymətə və xarici görünüşə diqqət yetirir. Lakin münasib qiymətə satılan hər avtomobil uzunmüddətli istifadə baxımından sərfəli seçim ola bilməz. Bəzi modellər sonradan yüksək texniki xidmət xərcləri və ehtiyat hissələri ilə bağlı problemlər yaradır.
Metbuat.az xəbər verir ki, avtomobil mütəxəssislərinin fikrincə, xüsusilə ehtiyat hissələri çətin tapılan və servis imkanları məhdud olan avtomobilləri alarkən ehtiyatlı olmaq lazımdır. Belə maşınlarda kiçik nasazlığın aradan qaldırılması belə gözləniləndən daha baha başa gələ bilər.
Yanacaq sərfiyyatı yüksək olan avtomobillər də gündəlik istifadə üçün hər zaman sərfəli sayılmır. Xüsusilə şəhər daxilində tez-tez istifadə edilən avtomobildə yanacaq xərci ümumi büdcəyə ciddi təsir göstərir. Buna görə avtomobil seçərkən yalnız alış qiymətinə deyil, aylıq istismar xərclərinə də diqqət yetirmək vacibdir.
Yaşı çox olan və texnologiyası köhnəlmiş avtomobillər də alıcı üçün risk yarada bilər. Belə maşınlarda yürüş artdıqca mühərrik, sürət qutusu və digər əsas hissələrin təmirinə ehtiyac yaranır. Köhnə modellərə bazarda tələbatın azalması isə onların gələcəkdə satılmasını çətinləşdirə bilər.
Mütəxəssislər xaricdən gətirilən avtomobillərin seçimində də diqqətli olmağı məsləhət görürlər. Avtomobilin qəza tarixçəsi, su altında qalması, elektron sistemlərinin vəziyyəti və real yürüşü əvvəlcədən yoxlanılmalıdır.
Bu səbəbdən avtomobil alarkən yalnız ucuz qiymətə aldanmaq olmaz. Ehtiyat hissələrinin əlçatanlığı, servis xərcləri, yanacaq sərfiyyatı, etibarlılıq və sonradan satış imkanları birlikdə nəzərə alınmalıdır.
