Dünən Nyu-Yorkda "MTV Video Music Awards" mükafatlarının təqdimat mərasimi olub.
Milli.Az TMZ-yə istinadən bildirir ki, "Madison Square Garden"də keçirilən və ən yaxşı videokliplərin dəyərləndirildiyi mərasimin triumfatoru amerikalı müğənni Beyonse olub.
34 yaşlı müğənni "Formation" mahnısının videoklipi ilə "İlin ən yaxşı klipi", "İlin ən yaxşı rejissor işi", "İlin ən yaxşı xoreoqrafiyası", "İlin ən yaxşı montajı", "İlin ən yaxşı operator işi" nominasiyalarında, "Hold Up" mahnısının klipi "Ən yaxşı qadın müğənni klipi", "Lemonade" mahnısının klipi isə "İlin ən yaxşı irəliləyişi" nominasiyasının ən yaxşısı seçilib.
"İlin ən yaxşı kişi müğənni klipi" nominasiyasında dünyanın ən məşhur və varlı DJ-i Kelvin Harrisin Rianna ilə birlikdə ifa etdiyi "This Is What You Came For" maşnısının klipi qalib sayılıb.
"Ən yaxşı videoeffektlər" nominasiyasının qalibi isə Britaniyanın "Coldplay" qrupunun "Up&Up" mahnısının klipi seçilib.
"İlin ən yaxşı videosu" nominasiyasında Beyonse əri Cey Zinin "Famous", kanadalı reper Dreykin "Hotline Bling", Adelin "Hello" və Castin Biberin "Sorry" mahnılarının videokliplərini geridə qoyub.
Beyonse mərasimə polis zorakılığı nəticəsində övladları həlak olmuş qadınlarla birlikdə qatılıb.
Bu qadınlar ABŞ-da qaradərili qadınların "Mothers of the Movement" hərəkatını təmsil edirlər.
Həmin qadınlar arasında Lesli MakSpadden də vardı. Onun oğlu Maykl Braunun ağdərili polis tərəfindən güllələnməsi Fergüsson şəhərində kütləvi iğtişaşlara səbəb olmuşdu. Beyonsun yanında polisin qətlə yetirdiyi Treyvon Martin, Erik Qarner və Oskar Qorantın anaları da vardı.
"MTV Video Music Awards" mükafatı 1984-cü ildə təsis olunub. Bu mükafatın laueratlarına MTV telekanalının loqotipi olan bayrağı əlində tutmuş skafandrlı astronavt formasınla heykəlciklər verilir.
Milli.Az
