ABŞ-ın Nevada ştatındakı Las-Veqas şəhərində "Billboard Music Awards" mükafatlarının təqdimat mərasimi keçirilib.
Milli.Az TMZ-yə istinadən bildirir ki, 24-cü mərasimdə britaniyalı müğənni Adel "İlin ən yaxşı sənətçisi" nominasiyasında qalib gəlib. Qastrol turunda olduğundan mərasimə qatıla bilməyən Adel, ümumiyyətlə, 8 nominasiyada mükafata iddialı idi.
O, 5 nominasiyada, o cümlədən "Ən yaxşı qadın müğənni" və "Billboard 200 çartının ən yaxşı albomu" nominasiyalarının da qalibi olub.
Kanadalı ifaçı The Weekend nominasiyaların sayına görə rekord vurub və aldığı mükafatların sayına görə də liderə çevrilib. 19 nominasiyada adı çəkilən müğənni 8 mükafatı, o cümlədən "Top Hot 100" çartının ən yaxşı sənətçisi, "Ritm-n-blyuz stilində ən yaxşı ifaçı" titullarını alıb.
"Ən yaxşı kişi müğənni" nominasiyasında kanadalı Castin Biber qalib gəlib. O, britaniyalı Ed Şiran, kanadalı reper Dreyk, amerikalı Fetti Vapı geridə qoyub.
Hip-hop ifaçısı Fetti Vap "Ən yaxşı debütant sənətçi" nominasiyasının qalibi olub.
Müğənni Teylor Svift üçün mərasim yaxşı sonuclanmayıb. Belə ki, 8 nominasiyada adı çəkilən Teyor, sadəcə, "ən yaxşı qastrollarda olmuş sənətçi" adını alıb.
"Ən yaxşı duet və ya qrup" nominasiyasının triumfatoru "One Direction" olub. Britaniylı ifaçılar amerikalı "Maroon 5" və "Twenty One Pilots" qruplarını, habelə əfsanəvi "The Rolling Stones" və U2-nu geridə qoyublar.
"Ən yaxşı rok ifaçı" nominasiyasında "Twenty One Pilots" qalib gəlib, qrupun "Blurryface" albomu isə "Ən yaxşı rok-albom" adlandırılıb.
"Billboard Music Awards" illik mükafatı 1989-cu ildə Billboard jurnalı tərəfindən təsis olunub və o, "Grammy Awards" və "American Music Awards"la birlikdə ABŞ-da ən nüfuzlu musiqi mükafatlarından sayılır.
Milli.Az
